ويكيلكس في اللعوتة
كالعادة وضعت جوالي على الصامت واويت الي فراشي عند منتصف الليل ورغم ان هناك الكثير الذي يؤرقني الا انني تطبعت مع كل البلاوي فدخلت في سبات قد يكون مصحوبا بشخير لم يقطعه الا نغمة الهاتف (ما عشقتك لجمالك) تلك النغمة التي يتضايق منها بعض اصدقائي وانا ايضا الا انني لم اجد وقتا لتغييرها منذ اكثر من عام ولم اتبين الصوت ولكنه لم يكن غربيا على اذ ابتدر محادثته معي قائلا
--ياود با بنبن النائم ليها شنو؟
-- اهلا وسهلا معاى منو ؟
--معاك منو ؟ خلاص من هسه وبقيت تنسى ؟
--اسف والله ماعرفتك معليش اصلو الزول لمن يكون قائم من النوم ذاكرته بتكون محتاجة لانعاش
-- انعاش بتاع شنو؟ وانت اصلا النائم ليها شنو ؟ انا كونزليزارايس خلاص طلعتني من دفترك؟
---اهلين ,كوندي ام عصيبات . قلعتي من وين الليلة ؟ والطراك لينا شنو؟ ان شاء الله خير ؟
--ام عصيبات ؟ كمان انت بتقولها ؟ نسيت لمن كنت مكسر فيني ؟ نسيت ايام نديدتي ؟ نسيت لمن وسطت لى الدنيا كلها عشان تفتح معاى خط؟ نسيت الجرسة ديك كلها .
-- اي نعم انا كنت جاري وراك ووسطت ليك الدنيا كلها لكن انا كنت عاوز ارتبط بيك عشان احل مشاكل السودان معاكم لكن انتي رفعت لي القزاز وعملتي فيها عشرة بي قرش اها لمن الاضواء انحسرت منك وبقيتي نسيا منسية جاية الليلة تفتشي الماضي خلاص ولا وراح . خلينا من دا كلو ان شاء الله انتي تكوني زدتي كيلو كيلوين وضاريتي عصيباتك ديك
--- ياعربي يابتاع الجزيرة انت انا كنت وزيرة خارجية امريكا العظمى انا حا بقى في الاضواء حتى بعد موتي لكن خلينا من دا كلو وخليك من عصيباتي الكانت مبكياك في يوم من الايام انا الليلة جيتك بحاجة كبيرة اريتك تبقى قدرها وما تكب الجرسة
-- اها ام عصيبات جايبة لى شنو ؟ الله يكفيني شرك
-- ما سمعت بموقع ويكيليكس الكشف الوثائق الامريكية الخطيرة؟
-- بحليل سمعت بيهو وعارف انه من حركاتكم البتبتذو العالم اصلكم فلستو ودايرين قروش
-- اها النزيدك علم الموقع عنده اتنين مليون وثيقة يادوبك طلع ربعها . ماشفت الرؤساء والملوك اتراجفوا وكبو الجرسة كيف اها انت ابقى راجل وشيل شيلتك
-- انا مالي ومال ويكيليكس ؟ انا رئيس ولاملك ؟ انا حي الله زول منسي في بقعة منسية حتى قوقل ايرز ما بقدر يطلعها من الخريطة
--نسيت ياعربي الجزيرة الكلام الدار بينا في منزل السفير الامريكي في الخرطوم في المرة الوحيدة الاتقابلنا فيها لمن زرت الخرطوم بعد توقيع اتفاقية نيفاشا الزيارة القابلت فيها البشير لانه الوقت داك ما كانت في جنائية وقابلت جون قرنق نسيت الكلام دا كلو؟
-- بتذكر الحاجات دي كلها وبتذكر لمن قبلت جون قرنق قبلة لحقته امات طه وقلت لي القبلة دي كية ليك وكية لعرب السودان لكن الرسالة مالها وفيها شنو
--فيها شنو ؟ نسيت انك كتبت لي وقلت لي ما ترفعوا العقوبات عن الخرطوم؟ انا جيت عشان امهد لرفع اسم السودان من قائمة الدول الداعمة للارهاب ومن العقوبات الاقتصادية لانه الرئيس بوش وعد البشير بالحاجات دي اذا وقع نيفاشا نسيت انك كتبت رسالة طويلة قلت ما تعملوا كدا وانه الضغوط لازم تستمر وان النظام دا غير الضغوط ما ممكن يطبق الاتفاقية ؟ الرسالة دي موجودة وبتوقيعك وحاتطلع في ويكيلكس قريب جدا اها شيل شيلتك وشوف ليك طريقة تمرقك من الجماعة ديل
-- الله لاكسبك ايو متذكرها اها دايرة شنو مني عشان الرسالة دي ما تطلع
--(جايي تسالني الدبارة ) غنتها مقلدة ابوعركي . ايوا( خليك في الواقع ) غنتها مقلدة سيف الجامعة واستطردت عندك خيارين انا حارسل ليك قائمة مطالب متعلقة بالامن القومي الامريكي او تعتذر عن حكاية ام عصيبات دي وتصحح موقفك مني وتفكر في ارجاع مشاعرك القديمة
--يابت الناس انا كبرت وكركبت وانتي اصلك مكركبة لكن قبل دا كلو خليني النسالك التفلون دا انا عملتو صامت ونمت انتي شغلتي كيف؟
-- سؤال غبي لي زولة كانت وزيرة خارجية امريكا والله لو طلعت الشريحة كان هاتفك رن انت مسكين ولاشنو ؟ انت ما بتعرف امريكا انها ممكن تخش بين البطين والاذين
-- لاحول ولاقوة اها قائمة المطالب شنو ؟
الأربعاء 8 ديسمبر 2010 - 2:20
