الابراج السودانية

الابراج السودانية

برج القعونجة: من 25 ديسمبر الي 24 يناير

الاسبوع دا زي الزفت معاك.. يتسرق موبيالك.. وناس الحلة يجيبو حاج التوم عيان والبيت يتملي وتجي اخر الليل ماتلاقي سرير فاضي تنوم فيه

حبيبك بفكر انو يديك شاكوش لكن كضاب ما بيقدر عشان داخل في أضافرو من كبابي الشربات السقيتن ليهو...

برج العتود: من 25 يناير الي 24 فبراير

البتجي من السما تحملا الواطا الحرامي يسرق هديماتك كلهن....يخلي وشك واطا..

علي صعيد القلب احدهم يفكر في ان يحبك لكنو مستني لحدي ما الملاريا تخليهو .. اصبر وتصبر وأديهو فرصة..

برج أبو الجندب: من 25 فبراير الي 24 مارس

حسادك كتار في نعلاتك الجديدة الجبتهن من سوق اللفة.. مشكلة في طريقها اليك سببها الباقي الذي يحاول ان يزوغ بيهو كمساري الحافلة..

القلب: من تحب عندو فتاق في الصُرة داسيهو منك ...يحتاج الي تعاطفك... خليك حنين وبطل سغالتك دي...

برج العجل: من 25 مارس الي 24 أبريل

لا تحزن كونو بنطلونك الوحيد العاجبك يحرقو ليك المكوجي...

القلب: بالرغم من حرصك الشديد حبيب القلب يكتشف انك بتسف صعوط... نوصيك بالتبرير إنو ضرسك كان واجعك...

برج القرنتية: من 25 أبريل الي 25 مايو

بوليس الحركة يقطعّك تلاتة ايصالات مخالفات بالرغم من انو انت ماعندك عربية! خليك صبور والمؤمن مصاب..

القلب: حدد بتريد منو؟ .. امك واللا مرتك.... واللا فلانة ديك؟... راجع فلم انف وثلاثة عيون....

برج البعشوم: من 25 مايو الي 24 يونيو

ما تنوم تحت الحيطة الجمب المخزن في بيتكم لانها ممكن تقع في أي لحظة....

القلب..حبوبة جيرانكم المخرفة تنشبك فيك وتفتكرك راجلا .. تعامل مع الموقف بحكمة واتوكل علي الله واعقد عليها!

برج الجرو: من 25 يونيو الى 24يوليو

الجاتك في مالك سامحتك... هوي ما تصدق.. لا سامحتك ولا حاجة وانت مفلس كدي....فنانك المفضل ياخد علقة في حي شعبي....

القلب زوجتك تكتشف علاقتك بست الشاي..... لتلافي الحرج ارفع شعار الشاي مضر بالصحة..

برج ام سيسي: من 25 يوليو الي 24أغسطس

أبعد الببسي الحجم العائلي من متناول إيد جدك عشان نفسو صغيرة وشرفان .. قد يتنفخ وربما يتلحس ليكم..

القلب: حتاخد علقة من أحدهم لأنك تشبه الخالق الناطق من ينافسه في الجكس حقو..... أقبل إعتذارو و أعلم ان الدق قسمة ونصيب..

برج الضب: من 25 أغسطس الي 24 سبتمبر

رئيسك في العمل مكجنك وشاميك....حتزيد كجينتو ليك هذا الاسبوع...

القلب.... شكلة بينك وبين من تحب سببها صرفة الختّة..... خليك تفتيحة أخد الختة واعمل أرنب نط بلا حب موظفات بلا هم.. شوف ليك زولة مقرشة خليها تربيك كويس

برج القرموط: من 25 سبتمبر الي 24 أكتوبر

هذا الأسبوع يتاورك الحنين مرة اخرى.... لا تكترث لنضم الناس امشي بالطريقة البتريحك..

القلب كن وفيا لمن تحب لأنو ح تنقطع أضانو اليمين في حادث حركة .. وأعلم ان الحب في القلب وليس في الإضنين..

برج الفاتح: من 25 أكتوبر الي 24 نوفمبر

كلبتكم تلد ستة جريوات تفقدو اتنين منهن.... ركز علي جيرانكم في اليمين الخشم بابهم اخدر.. جارتكم كاتباك عند فكي أبكر ودافنة العمل تحت الزير القدام بيتكم

القلب : صدق حبيبك لأنو فعلا سهر الليالي.. جندبة دخلت اضانو بالغلط ساهرت بيهو .... احمد ربك انها دخلت الاضان....

برج ود أبرق: من 25 نوفمبر الي 24 ديسمبر

الخبر الحلو انك حتقبض قروش.. الخبر الما حلو انو نصها حيمشي لسيد البيت الطالبك، وربعا لبتاع الدكان والباقي تقلعو منك مرتك حمرة عين كدة وابقى راجل قول بغم.. ياخوي المال تلتو ولا كتلتو..... لكن كتلتو أريتا كتلة السودا والرماد....استعوض الله ساي..

القلب: جارتكم المكسراك حتجيها حمى أم برد وحتفك الهضربة ومرتك حتكون جاية تكفر ليها.. غايتو لما تحكي كل البينك وبينا وبعد ماتشيل شيلتك مع مرتك أم جضوم دي بوصيك تخلي حنكك سنين وتتخن جلدك

» الشهادة السودانية
» العامية السودانية
» من روائع الامثال السودانيه
» استطلاع حول امتحانات الشهادة السودانية في قوز ابوروف