قوزابوروف حضاره كانت ومازالت..

حكي لي الخال والوالد عبدالله الدخيري اطال الله عمره عن التقدم الذي تشهده القريه الان هوليس بجديد علي هذه القريه العريقه فقال ان هذه القريه كانت في سابق عهدها ملمه بمبادئ التكنلوجيا حيث انها كانت القريه الوحيده التي تملك تلفزيون في ذاك العهد وكانوا يذهبون به الي القري المجاوره ليستأجرونه لهم وكان ذلك بمثابه فخر لهم ..فهاهي قوز ابوروف تواصل سباقها في مجال التكنلوجيا واصبحت اول قريه تملك موقع الكتروني علي الشبكه العنكبوتيه يجمع ابناء القريه..

مشكور عبد المحسن على الكلام الطيب
بالاضافه لذلك عمك قوقل مبسوط شديد
من هذا المنتدى

و الله يا محسن نحن عهد بداية التلفزيون دا حضرنا جزء منو
كان في تلفزيون موسى
و قد تغنت المرحومة امنة جابر(ام بقة) لموسى
قائلة
موسى ترزي
موسى عندو السسفون(تقصد التلفزيون)
الي اخره
و في ذاك الزمان كان للترزية مكانة لا تضاهيها مكانة اخرى
و الدليل على ذلك ان اغلب اثرياء القرية في ذاك الزمن كانو من الترزية(ابوك النو و خلف الله ود الحربي)

شباب تحياتى ليكم جميعا وتحية للزميل والصديق عبد المحسن
التلفزيون فى القرية كان قديم جدا واول زول كان عندو تلفزيون هو عمكم النور ود عبد الله
قبل ان يهاجر الى القرية 23 .... وورثه موسى محمد توم
واول راديو كان فى الحلة لا اذكر تاريخه كان يملكه العم يوسف ود تاج الدين والناس كانت بتتجمع عشان تسمع النشرة
ثم بعداك جاء رادى حاج الصادق
وتلفزيون عبد الباقى وتلفزيون النقر والتلفزيون الملون الوحيد كان يملكه الدسيس عبد اللطيف وده كان ذو طابع برجوازى بحت
يعنى لامكان للرمتالة ....
ثم تانى تلفزيون البلال عطاء المنان وده رغم البرجوازية كان متاح للجميع وبشكل استثمارى وكان تحت ادارة الاخ عابدين قسم الله

تحيه صباحيه لاعضاء المنتدي وأشكر الاعضاء الذين علقوا علي هذا الموضوع ..

لكن برضو ايام قلة التلفزيونات دي كانت
اجمل من هسه لان الواحد مننا زمان كان بيستمتع
وبجهز ميتو من العصير واهم شي حق التسالي
وكمان في برنامج رمضان اكان في المسلسل الاول
والتاني تحضرالاول وتمشي تتعشى بي مزااااااااااااااج وتجي
راجع منشرح للنادي..والله زمن جميل

يحكي العم جابر ضو النور انه كان في زيارة لاقارب له بقرية البيلاوي ورأي الراديو و عندما عاد و في جلسة صيفية اخبر رفاق الصبا بانه قد رأي صندوق يتحدث بقرية البيلاوي فتم تصنيفه من فئة الكذابين "جابر بقى كضاب كضب"