المدهش ولم اكن اتوقعه ان المصريين لا يعرفون كلامنا السوداني وكنت اظنهم يعملونها من باب الاستهبال لكن ما وجدته فعلا ان قلت للمصري (قلت شنو )يعاين فيك ما يعرف كلامك الا تتكلم زي ما قال المسلسل(بتوول ايه )
المهم الواحد مياتو الكان بدفعها في النادي ماضاعت عبس وكان عمرو المصري اكثرهم من يجادلني ان كلامنا السوداني سريع وغير واضح حتي وصل الي قناعه شخصية اننا نحن نتكلم اللغة العربيه لكن لا نفهما...بس المصريين بالرغم من انهم عندهم عادات لا احب ان اذكرها لان الكل تقريبا ملم بها الا انهم احيانا عندهم روح مرحة وتحس احيانا انهم كلهم دراويش يتكلمون عن اي شى يقع امامهم
مره كنت ماشي علي البلاط وكان مبلل شديد وانا ماشي بسرعه انزلقت زلقه حاره سمعت ليك صوت مصري بنده علي وكان زعلان مني شديد وكورك زي المدرب:حرام عليك البتعملو في نفسك دة يازول. مش ممكن. ما تثقش في نفسك زياده عن اللزوم
مره لاقني احمد سمير ايام الانتخابات وقال لي انا شفت اليوم عمر البشير بيكلم في الناس ورافع العصاية
-بوول ايه ياحمد
والله مش عارف لكن شكلو بوول الي مايصوتليش حا اوضبو بالعصاية دي
عثمان دة كمان عند قصص تقطع مصارينك قال لي انا كنت استاذ انجليزي واغتربت برة مصر ما لاقي اي شغل في الدوله المشيت ليها المهم واحد عرفني استاذ انجليزي قال ليه ان عاوز مذكره لعمال الكهربا كتثقيف ليهم.عثمان ما عندو اي علاقة بالكهرباء لكن كان مفلس شديد قال للراجل 3يوم المذكرة تكون معاك ....قلت ليه وكتبت ليهم شنو ؟؟؟؟ قال بداها كدة (يعتبر المفتاح الكهربي اهم وسايل التحكم ويتكون من جزئين (الاون والاوف ) شفتو عثمان اديسون ده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ظ
الجمعة 30 أبريل 2010 - 2:23
