اضبط.. (جون سينا ) بشرب المديده ...!!!

وانا ماشى فى السوق الكبير بود مدنى .... لفت نظرى محل لبيع المديده .....

الكلام ما المديده ..... ى!!!! الكلام اليافطه بتاعت المحل .... سيد المحل معلق ليك صورتو بى جنبه وحالق حلاقه جديده ...... زى الداير يطبعا فى غلاف شريط كاسيت ... يعنى عامل فيها شارد الذهن !!!! والجنبه التانيه (جنبت

حبيبك فيها صورة المصارع الشهير جون سينا ...... ااىىىى جون سينا الواحد دا ... الكلام برضو ما فى الصوره ... الزول دا ..يعنى جون سينا ماسك ليهو كورة مديده ... دى كيف دى..؟؟؟؟ والحمد لله جون سينا ماقاعد يجى مدنى

يعنى كان عادى بفتح بلاغ (وبورد بينتو ) وما بين القوسين تعنى شهود من اكل جرف او بلاد غيره

..المهم ... نحن بعد مشكلة دارفور .... وعمك اوكامبو ... نبقى فى حقوق جون سينا ؟؟؟؟ ووكالات الانباء العاطله

تجى وشى منظمات ... وافلام وثائقيه عن المديده ..... ودا كوووولو هين ..الخوف يصنفوها لينا من المنشطات ...

ويقومو يضمونا للدول المنتجه للمخدرات ... وهو نحنا انفكينا من الانضمامات الضامنا ليها...

بس انا بى تحت تحت عجبنى بتاع الصور والدوبلاج العمل الحركه دى.... جاب ليك جون سينا مبتسم ونافخ ليك

عضلاتو .... والابتسامه بتديك احساس ......انو البشرب فيها دى الكوره الثالثه ....!!!! وانو المديده دى هى الطريق للبطوله ... شفتو محن المصورىن ديل ...؟؟ وومكن اى منافس يطقطق ...عااااادى وبلياقة كوره واحده بس

ملحوظه :ا

المحل راشى تمممام ...والكوره ب10 جنيه فقط وحاولت اصورو ليكم بالموبايل ... بس عمك بتاع خدار فارش جنبو كورك معاى ( انتو العالم دى جنت ..تقيف فى نص الشارع ) .. وانسحبت

ودمتم

والله يا محمد الكوره بي عشره جنيه غاليه وإلا فعلا يكون فيها منشطات كدي إنت جربا لينا لو لقيتا جامده محينه ده بكره جاي مدني نوصيهو يجيب لينا منها

ود النو الفوق ...
شكيت محنك ..شكية
انت حتكون شاهد الملك الوحيد فى القضية
لكن ممكن تمشى تبتز بتاع الكشك ده وتقول ليه انا من المعجبين بى جون سيناء يا تعمل
لى مرتب يومى يااوديك فى ستين داهية
......
طبعا راتبك اليومى ما بيقل عن تلاتة كور فى اليوم وتكون كفيت سيد الكشك شر البلية

وينك يامحمد النو واللة فقدناك كتير وفقدنا تداعياتك وبالنسبة لصورة جون سينا في محل المديدة افتكر هذة لجلب الزبائن ولكل محبي جون سينا وكل محلات المديدة تجدها ملصقة بصور المصارعين لكن مديدتكم دي غالية زي ماقلك اخوك انا خليتها بواحد جنية يعني الف جنية بالقديم والشي دة ما مديدة براها وكدة اتاكد يعني لكلامك دة الواحد يوميتة كلها ينهيها في كورة مديدة.
ملحوظة :امس كان في ما طش جامد بين جون سينا وباتيستا وانتهي بفرارباتيستا من الماطش والثاني بين فريق باتيستا وفريق جون سينا وانتهي بفوز فريق جون سينا بعد ان لقن راندي اورتن الملقب بالأفعي باتيستا درسا لم ينساة في حياتة
وانا طبعا من محبي جون سينا جدا وضمني معاك انشاء اللة اطلع بنص كورة وانت وديهو زي ماقالك الاخ ابونورا في ستين داهية وقول ليهو في واحد بوديك في ثلاثين داهية مو ستين اديهو نص كورة بس

يا أخوووي الخواجات ديل ساسن ساس مديده وبيره بس المديده دي عندها اسم تاني ذي ما جدودنا هنا بفتخروا بان جسمن مبني علي اللبن والسمن والمريسه(شفت التناقض ده كيف حلال وحرام سوا)

الله يسامحن

شكرا الأخ محمد النو علي هذه الماده الدسمه كما المديده
كما نما الي علمي ان المديده اصبحت انواع كتييره والنوع الرائج هذه الايام يسمي(توربورا) ولا ادري مايميزها عن المديده التقليديه بالمناسبه دي يامحمد النو عندي ليك اقتراح : ما تخلي ورشتك دي وانا اخلي بحوثي دي ونعمل لينا مصنع مديده ....مصنع مديده عديييييييييييييييييل كدا ونعمل مراكز لتوزيع المديده ومناديب ونفتح لينا افاق تصدير للوطن العربي واوربا وتبقي المشروب الرسمي لدوري ابطال اوربا لكرة القدم خلي ناس رييد بول ديل يشوفو ليهم شغله وننتج كل انواع المديده وماننسي ناس السكري نعمل ليهم مديده دايت ونعملها في عبوات باأحجام مختلفه عشان هدفنا برضو راحة المواطن ويكون عندها ديباجه مكتوب عليها:
العبوه:100 جم

تاريخ الانتاج:
تاريخ الانتهاء:
الطاقه : 50 كيلوكالوري
المكونات :
تحفظ في مكان بارد وجاف ...بعيدا عن متناول الجلاكين
رج العبوه جيدا قبل الاستخدام

وحافظوا علي نظافة مدينتكم كمااااان
اه رايك شنو ياود الخاله

ابو على .. خالد النيل ..

حسيت بالفرح وانا بقراء فى كلامكن ... حسيتكم بتغيرو على الفتريته ودا احساس جميل ..ولسان حالكم بقول

( الفتريته اتهانت يا رجااااله)

وانا بعتذر للسعر ... والصحيح هو واحد جنيه ...وبعتذر كمان لجون سينا ... خالد كيف الغربه الكدروكيه؟؟

ابو نورا .... ياراقى

وينك يارجل ...والله كل ماقول ( امارقك كده )على بوست مطرف .... لنفتل الحروف حبلا" للتواصل ... ونشكر احذيتنا ... لعشقها ... لدروب الحله

نزار ... يا ود الحله ... ( مؤقتا" ).. ا

براااااك جيت فى التايم ....المريسه دى بت اعم المديده ...لزم ..!!! وانا كان داير اجيب الكلام ..دا بس قلت انتظر

شويه امكن يفتحوا ... وغايتو الفتريته دى عندها مشتقات كتيرررره منها .. بشربو .... ومنها بتمسحوا بى !!!!!! ا

خطاب ... ا

طبعا" ذكرتنى ... مصنع الشفاء ... الضربو ... اولاد عم جون سينا ... بعدين مصنع (الردبول )ملك رجل اعمال يهودى ... وكده بتكون كبستنا فى نص الارهاب ...يعنى الا نعملو ...زى مصنع كنانه ..نبيع الاسهم فى البورصه العالميه ...ونتقى شرهم

ودمتم

والله يا أبو مصعب ريحتنا الله يريحك بالسعر الجديد ده _ بعد ده وصف لينا محلها وين

يا ابومصعب يا مدادي لو عملت المصنع عليك الله اعمل لي معك توكيل مديده

مروان عزالدين

مرحبا" بك فى المنتدى ... ونتمنى ان تكون عضو فعال ... ومزيدا من التواصل

بس حركتك شينه .... اول ما جيت داخل ...جاى تكابس المديده ...؟؟ يا شيخ ...

ودمتم

تسلم ياخال على التعريف بما هية المديده
ومدى ارتباطها بجون سينا

لكن في مديده كده بقولو ليها باكمبا كان

عزمني ليها نزار زات يوم في السوق العربي

زمن كان السوق العربي ..دي طبعا اتناولناها

ع الرصيف مباشرة" يعني ما كان في لافته مضيئه

تحمل صوره من صور جون سينا وما الي ذلك

يعني الدعايه الوحيده هي احجام الناس البتتناول المديده..

انا اقترح ليك يا خال انك تشوف نوع المديده باكمبا

اذا في مدني مافي..تقدم تصور للمحلات وتكسب المليون

يا ابوروف تتجااااازي ...في داعي للفضايح... دي علي وزن انا والكاشف أخوي...لكن بيني وبينك الباكمبا بتاعت العربي بالجد مغريه با اخي دي انا كنت بركب ليها مواصلات قدر سعر الكوره ومره عزمت صاحبي نيجيري بعد ما لبع كورتو وقش خشمو قلت ليهو رايك شنو؟ رد لي بالانجليزي :ooh its very deliciousوقال تاني الا ما يجي بي جائي بزود وبمشي

"نزار الغرقان"]يا ابوروف تتجااااازي ...في داعي للفضايح... دي علي وزن انا والكاشف أخوي...لكن بيني وبينك الباكمبا بتاعت العربي بالجد مغريه با اخي دي انا كنت بركب ليها مواصلات قدر سعر الكوره ومره عزمت صاحبي نيجيري بعد ما لبع كورتو وقش خشمو قلت ليهو رايك شنو؟ رد لي بالانجليزي :ooh its very deliciousوقال تاني الا ما يجي بي جائي بزود وبمشي

انت حتى الان قاعد تمارس النشاط ده ولا خليتو؟؟؟؟؟؟؟؟؟؟؟؟؟؟؟؟؟؟

الشيء بالشيء يذكر
نحي القدوقدو و ام جنقر

ابوروف كتب:: "نزار الغرقان"]يا ابوروف تتجااااازي ...في داعي للفضايح... دي علي وزن انا والكاشف أخوي...لكن بيني وبينك الباكمبا بتاعت العربي بالجد مغريه با اخي دي انا كنت بركب ليها مواصلات قدر سعر الكوره ومره عزمت صاحبي نيجيري بعد ما لبع كورتو وقش خشمو قلت ليهو رايك شنو؟ رد لي بالانجليزي :ooh its very deliciousوقال تاني الا ما يجي بي جائي بزود وبمشي

انت حتى الان قاعد تمارس النشاط ده ولا خليتو؟؟؟؟؟؟؟؟؟؟؟؟؟؟؟؟؟؟

الله يكفينا شر الممارسه....ده كان زمان لما أخوك كان صبي

» اضبط زوار من اسرائيل في منتدانا لا توجد صور