اذااستعرضنا حال القرية فى السبعينات كانت المساكن معظمها من القش وحتى المسجد العتيق والاهالى يرحلون الى (مشروع الجانبيلة)(السوكي)(والحنين)مشروع نورالدين واخيرا الرهد الزراعي كعمال موسميين لجنى القطن00قبل الرحيل هناك اجراءات السلفية حيث يحضر المزارع ويحجز عدد من الاسر ويعطيهم مبلغ من المال كسلفة تسترد اثناء الانتاج00بعد داك الاسر تكون مهياة للرحيل 00هناك عدد قليل من الاسر حباهم الله بسعة من الرزق (وديل)(مابيرحلوا)لكن (بتحملوا)اعباء الطلبة00تخيلوا معى هذا المنظر التراجيدى000اللوري وصل000رفعوا العفش00العناقريب(هبابات)تربط على جانب اللورى والجزء الاخر فوق اللوري وفى نفس الوقت يكون مظلة للركاب (000الجدادكياك كياك )على جانب اللورى000المراة الحامل تركب فى (التندة)00ماسكة جردل العجين (ومقزوز فيهو البيض)(00وشايلة شوية سواسيو فى القفة)والتندة (لل vipفقط)00الجيران مودعين(ياحليلكم الليلة على العديلة)00وداللفندى قال هى كان عديلةالزول( بخلي بيتو وبضرب البرد والقرة00)00ابونا بتاخرلو يومين تلاتة عشان (اعدل عوج البيت وازربو)واجيب لينا شياه لبن00اها ودعناكم للمابخون الوداعة 00 تحرك اللورى ووصل تقريبا بعد ساعتين ونزلوا فى رواكيب مجهزه مسبقا من قبل المزارع تسمى (الكمبو)وهى المعسكر وتقريبا مستمدة من الكلمة الانجليزية (camp)المهم هذه الرواكيب لاتقى شر البرد00الاطفال يغطوهم بالشمال)المصنوعة من الشعرويستمر لقيط القطن صبا ح مساء لمدة تلاتة شهور عند العودة طبعا الناس محملين بخيرات المشروع فول 00قطن 00شوية قريشات 00الاسر( الما رحلت )لها حظ مقدر من هذه الخيرات وخاصة اذا كان ولدك طالب مع احد هذه الاسر تتضاعف لهم الهدية بدل جردل فول جردلين اوتلاتة ونفس الشى من القطن00هكذا كانت حالنا فسبحان مبدل الاحوال من حال الى حال00اللهم انعمت فزد00ودمتم بخير0
الثلاثاء 3 يوليو 2012 - 17:46
