سلام أطنان من بلاد تموت من البرد حيتانها

السلام جاكن يا شباب القوز الرايعين البتملو العين .. نعلكن طيبين ومبسوطين ... سلام لكل الاهل الأحباء وربنا يديهم وافرالصحة والعافية ... وسلام خاص جدا للقائمين علي أمر هذا المنتدي .. أتمني من الله أن يجعله ديواناً عامراً تهوي إليه قلوب وعقول أبناء وبنات حلتنا التي تظل علي الدوام محمولة في حدقات عيوننا وإن تفرقت بنا السبل وبعثرنا طلب الرزق في مناكب الأرض .. ودمتم

عزيزنا الباشمهندس نزار .. يديك العافية وتشكر علي الترحيب الحار .. أنا ما بستاهل الكلام دا كله .. كبرت لي راسي لامن كوركت لي خواجات ماشين بي شارع بيتنا يمسكوه لي .. شيشك علينا شوية ..
أنا أول مرة أعرف انه حلتنا عندها منتدي أمس وبالصدفة المحضة في ونسة عابرة أول حاجة عملتها سجلت حتين شفت جواه في شنو .. وبيني وبينك فرحت وزعلت في نفس الوكت .. فرحت لانه أصبح عندنا بكان تحت شمس الفضاء الاسفيري نأوي إليه في الخلوة والجلوة .. ضلالة في هجير المنافي الموحشة ... وزعلت لانه (بدون ما حد إزعل) إعلامكم ضعيف في ما يتعلق بتعريف الناس بالمنتدي ودعوة الجميع للإلتحاق به وتشجيعهم علي ذلك بهمة لا تستكين للإحباط أو التخذيل ... ياخي أنا قعدت في السودان شهر كامل مافي زول جاب لي سيرة المنتدي دا .. واضح إنه في أعداد كبيرة من أولادنا وبناتنا بقي عندهم access للنت وليس هناك ما يمنعهم من الانضمام اليه .. المفروض الحاضر يكلم الغايب والاعمي يشيل المكسر ويجو طايرين علي المنتدي ويشاركوا فيه كلما زحمة الحياة القاسية دي تديهم فرصة .. إن شاء الله الواحد يجي يقول للناس انعل ابوكن ويمشي (أهو في النهاية ورا وشه) .. طبعا بمجرد ما سجلت بطلت أي حاجة ولميت ليك في البوستات معط حتي كدت أن آتي عليها جت في جلسة واحدة متجاهلا شفعي المحيطين بي إحاطة السوار بالمعصم .. وكانت جلسة مفرحة ولذيذة ما ناقصة الا اللقيمات .. المساهمات قيمة والحوار راقي لا يشوبه عنف بادية و لا حذلقة أدعياء كما هو سائد في كثير من الأسافير .. لفت نظري بوست للأديب الأريب محمدالنو يطالب فيه بجلب المنبر في سوق الله أكبر وذكرني ما يرمي إليه بقصة قصيرة للأديب بشري الفاضل ملخصها أن النيل رفع ضفته اليمني وأرخي اليسري صائحاً في الناس يا قوم إفلحوا الأرض أو أدلق الماء (يعني بالعربي الفصيح كدة هوي يا مطاميس يا تزرعو الواطة الأداكم ليها الله دي ولا بكشح الموية حقتي دي في صحراء بيوضة) ... المهم يا زول الكلام كتير نكمله أن شاء الكريم في مرات قادمة ... بس قبل ما أختم بسأل هل ناس حلتنا عندهم قروب في فيسبوك ولا نسوي لينا واحد?

سلام من بلد الكتاحة و الشعفوفة
وخش تووووش
حبابك ف أي فريق خش ( أقصد منبر )

هاذول هه منبرنا دا ماهو بنبر دا قاعدين فية ناس كتر

أه وكت أت جيت الحله الناس من شوقا ليك ماأتذكرت تقول ليك

ذي أنا هس كنت داير أقول ليك دوس هنا خش قروب شباب من أجل قوز ابوروف قمت نسيت اللنك وجيت دافرني الشوق والحنين

وروعتك تنسينا اتعاب السنين ودرشة خريف أم بقه

يديك العافية يا الخليل .. في انتظار اللنك .. حنست عمك قوقل لكين ما اشتغل بي وضرب طناش .. اها ات كمان ما تبقي زيو والحقنا فسراع فسراع يلحقوك وليداتك إن شاء الله

هلا بالاستاذ حاتم صديق الحاج ولو رحبت مايكفي لك مليون ترحيبه هلا وغلا في قوز ابوروف التي يزهو ابنائها بالعلم والمعرفه والفكر بانضمامك لنا وكل شوق بقرائه حروف قلمك وميض عطائك ونحن بانتظار قلمك ومشاركاتك وحضورك وتفاعلك ودمت ودامت قوز ابوروف مفتخره بجيلها وابنائها الاوفياء ونتمني لك التوفيق واقامه طيبه في بيتك

انا عندي مشكلة مع اللنكات ما حصل نزلت لنك الا وطلع ضارب....الله يكفينا شر العوارض كدي قول بسم الله وجرب ده

https://www.facebook.com/#!/groups/171914409589586/198008900313470/?notif_t=group_activity

إديك العافية يا باشمهندس نزار .. بعد ما سميت بي الله وصليت علي النبي المعصوم ودخلت روحي في زريبة ود بانقا وندهت الصالحين جت ... لنكك شبك معاي مية المية وما ضرب ومافي ولا شوية عارض وقف قدامي ... وأنا هسا مفسبك معاكم تب ... الله يقدرنا علي التواصل ... الخليل مشكور علي التنبيه للقروب وتووووووش ... يوسف ود أختي الجاز شكرا ليك .. سلم علي العول كلهم وبتفسبك معاك إن شاء الله ...

الاخ حاتم الف الف مرحب بك ونوّرت المنتدى وانا كذلك اضم صوتى لصوتك يادفعة (انو)الاعلام ضعيف لم اعرف هناك منتدى الا بالصدفة حينما حضر الاستاذ خليل لاسمرا لقضاء شهر العسل عليه 00لك العتبى حتى ترضى 00وربنا يحفظك وعيالك فى عاصمة الضباب 00لا تطوّل عشان تشق (وعر)ام دادول وتنزل الديوان وتلقى فيهو كل اخبار الحلّة زى ماقال ود سند مخاطبا (بعيرو) مسرعا لارض الم 000ايدين (اب تبوب)جيت شاق وعرهن خاتر
جيت لى ام عود تجمع فى النقع ماك فاتر
الحافظ حضورك ولى غيابك ساتر
اسرع واغلو ياالجمّام قفاك متماتر
اخى ارجو المراسلة على الايميل latief11190@yahoo. com
واخبار صديق الحسن شنو ؟؟
مع الف سلالالالام0

ولدنا ود محجوب الأبوروفابي الأصيل شكرا ليك علي الترحيب الحار والوردة الجميلة .. ربنا يديك الصحة والعافية ويحفظك في غربتك وفي حلك وترحالك ..
جنابو أبو عبد الله الأسمراني (نسبة إلي أسمرا وليس لونك الما أسمر) .. تشكر وشيك (زي ما بقولو الخلايجة) إيميلك وارجع لي ...

حبابك عشرة الاخ حاتم وحبابك تبً وانشاء الله سالم وغانم وشرفت الديوان وابقي واصل

يالف اهلا وسهلا بالاستاذ حاتم صديق نورت المنتدي

اطنان ترحيب بالأصيل سلالة الأصيلين بامسيكه وحاكم جد المنتدي اطفيت عليه اطنان من البهجه والاريحيه وازكيته بنكهة خاصة جدا وشوقتي الاعضاء ليه ولأني من دعاة النفره نطلب منك أطنان من شحذ الهمم تشمير ساعد الجد والتحزم والتلزم وانت اهل لذلك يالله كلنا عليهم

الأعزاء هاشم والزبير وعبد الرحيم مشكورين علي الترحيب والقومة ليكم ... ولكل شباب المنتدي تقبلوا مني وصية أخ كبير وهي أن تبقوا عشرة علي الباشمهندس عبد الرحيم دا .. رجل نضيف وما زول لولوة وقلبو الأبيض مفتوح شارع علي البلد الطيبة قوز أبروف ..وأنتهز هذه السانحة لتهنئة الحلة من خلال الأخ عبد الرحيم علي النجاح الباهر والمذهل للنفرة والصندوق الخيري والتي أثلجت صدورنا وطمنتنا انه بلدنا ما عليها خوف وإن شاء الله موعودة بمستقبل واعد ومشرق بشبابها الذين يسدون عين الشمس ما شاء الله عليهم ...
الوصية التانية اللي أكيد ما محتاجين يوصوكم بيها ألا وهي الوحدة ثم الوحدة ثم الوحدة وإن حدث إختلاف في وجهات النظر بين الناس فهذا أمر طبيعي بل وصحي عندما لا يفسد للود قضية ...

الاخ حاتم تحية طيبة من عاصمة الهضبة الارترية (اسمرا)والتى وصفها احد الصحفيين السودانيين بانها مدينة (تقع فوق الارض وتحت السماء )لان الضباب يلامس المنازل وبالمناسبة ارتفاعها 2700 قدم فوق سطح البحر عشان كدى طول السنة باردة لامروحة ولا مكيف وشكرا على الوصية الغالية(جدودنا زمان وصونا على الوطن على التراب الغالى الماليه تمن)وزى ماقلت (نبقى نضارب على الاسكاى بي بتاعى abu abeer65

يا مراحب استاذنا حاتم صديق نورت و شرفت المنتدى وزاد فخرنا بان منتدانا الان قد وجد له موطئ قدم في بلاد الانجلوسكسون