ليس هكذا نشارك

بسم الله الرحمن الرحيم
الاهل والعشيرة سلام من الله عليكم وكيف اجدكم ؟ في امان الله انشاء الله تاكلوا الطعام
وتمشوا في الاسواق بمناسبة اكل الطعام هنالك ظاهرة في القوز جد ما حلوة ارغب في نقاشها
معكم وهي (مشاركة اهل العزاء بالزلابية (اللقيمات ) مع شاي الصباح ) مثلا تجد كل الناس
الصباح الواحد يحمل الي جانب قارورة الشاي (الثيرمث ) جردل زلابية يكفي لعدة اشخاص لا انظر
للموضوع من ناحية هنالك من يحتمل التكلفة و اخر يعجز لكن المناسبة نفسها ليس محل احتفال
ومعروف صنع الزلابية مظهر احتفالي حتي في اكثر المجتمعات السودانية رقي ناهيك عنها في القوز
اضافة الي المشقة التي تجدها المراة في سبيل تجهيزها من القيام فجرا والازعاج وما الي ذلك . من
وجهه نظري الشاي فقط كافي جدا اضافة الوجبات الاخري .
عن نفسي لم افعلها البته علي قله تواجدي في القرية ولن افعلها باذن الله . وارجوا ان تشاركوني
الراي لهزم الفلهمة (العوراء) ليس هكذا نشارك .

عووووووووووووووووووووووك
تووووووووووووووووووووووووش
ههههههههههههههههههههههههههه
والله يا هاشم الموضوع كبيررررررررررررر
لكن انا بجد فكره الزلابية لناس المناسبة جميلة
ماتقول الزلابية لناس البكاء .......... ناس العرس برضهم بجيبوا ليهم
وهي نوع من المشاركة .........
ماتجي يوم تكتب لينا تقول خلوا الاكل البنشارك بية ناس البكاء
((( مرة كان في بكاء في الحلة الساعة 11 والناس مافطرت مشوا الدافنة والنسوان يوليون .... لحدي 1 ونص الناس في المقابر......... أنا جيت من بره الحلة مع ضيوف من الرهد ... وكانوا كثرين جدا ومنتظرين الناس تجي من المقابر فيهم واحد قريب الميت قال داير يمشي للنسوان يقوليهن خلن البكاء سون الفطور.........
جماعتوا قالو ليهو انتظر ...........

بقية القصة معروفة : الناس جو من المقابر لك واحد ع بيتو وهاااااااااااااك ياعمود وياجردل
الاكل ما يدي الدرب

قريبهم قال لي علي الطلاق انتو رجاااااااااااااااااااااااااااااااااال ساااااااااااااااااااااااااااااااااي

والله يا هاشم كلامك اعوج وانا ما بتفق معاك فيهو ابدا..
اولا من ناحيه المشقه ليس هناك مشقه أمهاتنا الله يديهم ما قاعدين يشكوا من التعب والازعاج بل العكس يشجعن الرجال الكسالي للذهاب بالطعام اي والله شفت بعيني واحده بتقول لي راجلها والله لو ما قادر تمشي ناس العزاء انا بشيلوا امشي بيهو برااااي..وهذه مفخره..الشي التاني انو الزلابيه عمرها ما ارتبطت بالرفاهيه لا في البدو ولا الحضر (لو تورتات وبسبوسه معليش) بل في مجاعه 90 كانت المخرج من الجوع لمعظم الارياف..وقديما قيل(هانت الزلابيه وكثر اكلوها) وهذا يدل علي عدم قيمه الزلابيه عند الطبقه البرجوازيه..
واخيرا اختم بقول المصطفي صلي الله عليه وسلم عندما حدثت وفاه عند ال جعفر قال لاصحابهاصنعوا لال جعفر طعام فانه اتاهم ما يشغلهم) وكلمه طعام مطلقه يعني ممكن تجيب كل المطائب و الدسومات-جمع دسم-ان شاء الله هوت دوق والتحليه اسكريم الشعله وشوف كان ترجع بيهو البيت..
ودمتم

الاخ خليل نحن نقصد صناعة الزلابية لناس البكاء تحديدا مافيها نوع من المواساة يعني شاي
اللبن الصباح كفاية جدا .
الاخ نزار نعم صناعة الطعام لال جعفر واجب لكن ان تاتيهم بزلابية هذا شي غير كريم ثم ثانيا
الزلابية مظهر احتفالي بدليل انها بتصنع في العيد (الفطر و الاضحي ) ولضيوف ولعزومة من أرت
إكرامهم الشي الاخر نحن قلنا اعداد الزلابية به مشقة ولم نتحدث عن شكوي الامهات .هنالك الفطور
والغداء والعشاء ماهو الداعي لزلابية في الصباح أل جعفر محتاجين ايضا لمن يصبرهم وليس لمن
يحتفل باحضار الزلابية . شاي اللبن كافي جدا في الصباح ينعي بدل تخسر دقيق وزيت وخميرة وغاز وشاي احمر(سادة) ممكن تشتري لبن وتكتفي بتكون شاركت أل جعفر من غير مظهر احتفالي ..
السلوك هذا غير رشيد استطلعوا غيري وحتما تجدون من يشجبه بشدة.

ياهاشم المشكلة مافي جردل الزلابيه المشكله في انه بيت العزاء اصبح مكاناللشمارات كما يحلو للبعض التلفظ بها وحتي اهل المتوفي يسعون لهذا الحدث حتي يخرج علي اكمل زينةويقومون بجلب صيوانات فاخرة لاتدل علي الحزن ابدا وجلب طباخ ماهر لتقديم افضل والذا انواع الاطعمةوان هذة الاجوادهي التي تبعد المعزين عن اجواء الحزن وتذكر الفقيد وبالتالي يكون هنالك جو ملائم لتبادل(( الشمارات)) وصار العزاء مضرب مثل يقولو( عزاء فلان ولا عرس فلان ) وزمان كانت بيوت العزاء ياتي اليهاالجميع وعلي وجههم علامات الحزن والاسي وكل ياتي بما يرتديه وفي عجلة من امره ولكن الان تغير الحال عند النساء فعندما تسمع احداهن بان هنالك عزاء ترتدي افضل مالديها من ثياب ومصوغات وتاتي لمكان العزاء وتجلس كانها عارضة ازياء وتقول ليك الواحده منهن ((والله مابقدر امشي غبشا))

كلامــــــــــــــــــــــك عين المنطق يا هاشم ....
مافي مشكله فعلا اذا جبت شايل سيرمس شاي لكن تجي شايل ليك زلابيه
فعلا عوجه ونص ده تقليد غير مستحب اذاا نظر اليه فاعله من الزاويه الصائبه
انت مش عاوز تشارك ياااااااااااخي شارك بحاجه مناسبه قروش في الدفتر, سكر ,كيلة عيش
ده كلو خليهو يكفي انك تجي شايل فطورك بالفي بس... وثانيا بما انك جيت تواجب
من المفترض تتقى الله في مجسك في هذا المكان بقدر الامكان او واجب ناس
العزا و بسرعه اتوكل دي واحده من الاشياء التي تناولها الاخ خالد وياريت الناس
تقلل من الونسات الطويله في بيوت العزا

ا

المكونات :_ ا

دقيق _زيت _ شاى ( مجهول الهويه ) لبن او ساده

وقال الحبيب المصطفى (ص) ا لقمة فى بطن جائع كجبل احد من الاجر

ابحثو معى عن المظهر الابتهاجى فى تلك المكونات ؟؟؟؟

ولا اظن ان هناك احد يتباهى او تفشخر بهذا ( الدقيق ) ولا اظن

ان الزلابيه تتنافى مع بيت البكاء بل فيها نوع من المشاركه

وسد الرمق وهى اقل تكلفه ومن استطاع

هناك مواضيع حيويه اكثر من ذلك تحتاج للنقاش

واكرر اعتذارى للصديق العزيز هاشم

الاخ هاشم هل ان تعلم نحن الواحد من الصباح يشرب الشاي السادة التقيل علي الريق ويكتفي
مع إنه هذا اكبر خطا فى معدة لها عشرة ساعات خاوية وين المشكلة لو الواحد منا فك الريق
بأي شي والزلابية أحد الخيارات.
انا في تقديري لايوجد اي مظهر أحتفالي فيها غير إنه هذه مسالة نفسية فقط لإرتباطها بالاعياد
عندنا بالسودان ونحن ولله الحمد فينا روح التكافل المساندة بالذات في الاتراح يعني الجود
الموجود (وبليلة مباشر لاذبيحة مكاشر)
والزول العنده قروش يجيب اكل كتير والماعنده على
قدر قدرته ويكفي انه فيه الخير والمرؤة والمرجلة.

يا جماعه انتو بتقولو شاي فقط يكفي...علما بانو الشاي برضو مظهر احتفالي بدليل (حفلات الشاي) التي تقام في مناسبات كثيره ... نجاح طالب..عوده من الغربه..عيد ميلاد وبعدين الشاي ده من المكيفات يعني لما تجيب شاي الصباح وتشربو بتتكيف معناها انت متكيف من الشي الحصل امبارح ده (للمرحوم) مش كده ياهاشم ويا ابروف؟؟؟؟؟

الاخوة الاكارم السلام عليكم لازلت عند موقفي بان الزلابية احتفالية ليس تصلب مني لكن واقع
الحال يقول ذلك والعرسان حتي الان بدعوهم للعشاء زلابية . اذا اصرتوا علي غير ذلك
اقنعوا مقدمي دعوات المآدب خاصة العشاء بترفيع مكونات الوجبة وابعاد الزلابية عنها لانه يستقيم
منطق ان تاكل الزلابية في بيت البكاء و تسهر حتي انصاص الليالي وتاكل زلابية ايضا .

ياهاشم انا شائف الموضوع ده اخدت مساحة كبيرة وانت مصر على رايك
لكن لو وريتنا الجوانب السلبية فى الحتة دى تكون ماقصرت ويكون نقاشك سليم مية مية
قد نتفق معاك ونثنى على رايك ...
مافى اى مظهر بتاع تباهى فى الحاجة دى زيها وزى صحن الفطور او عمود الغداء والدليل على ذلك انو اى زول بيجيبا ومامقصورة على الاسر ميسورة الحال وبس
اما حتة الاحتفالية دى :ياخوى انت جائ تشاطر الاحزان ما جيت تعلن اضراب عن الطعام لتثبت به حزنك على الميت... يعنى صحن الزلابية مشاركة سليمة ...
فخالنا ابراهيم حامد اطال الله عمره لمن طلب حظر الشعيرية بكل ماركاتها المسجلة والمحلية ..
استند على كل الجوانب السلبية فى الزمن داك وقرارو كان فى محلو...وطلع الشعيرية زيها وزى الاسبرت فى الزمن العلينا ده... يعنى فى سوء استخدام حسب وجه نظر الخــــــــــال فاصبح يحمل لقب مميز جدا..ومتطور حسب ماركات الشعيرية ..فانت هسى يسموك شنو؟

يحكي انو وزير سوداني ذهب رحله عمل لدوله اليابان وكان يقف مع مرافقه في محطه المترو (VIP) وكان مخصص للمترو ان يقف موازيا لمدخل الركاب ولكن سائق المترو افلتت منه الفرامل وتجاوز فتحه المدخل بنصف اي جعل المدخل طوله متر واحد بدلا من متر ونصف وركب صاحبنا بكل حسن نيه وعندجلوسه اتي اليه طاقم المترو فردا فردا يتعزرون له عن هذه الغلطه الفظيعه(اكلو منو نص متر كامل من المدخل) صاحبنا اتحسس وقام يطيب في خاطر المرافق الياباني قال ليهو(دي عندنا في السودان عاااادي بتحصل) رد ليهو المرافق: (اسف سيدي لكن هذه اليابان ليست السودان)

الموضوع اعلاة يحسسك كان الزلابيه بها زئبق اوماشابهه
انا فى رائي ان الواحد يشارك انشاء الله بي زلابيه عليها
نقش من الذهب مشاركتك لها مكانها عند اهل المأتم فدع الاخرين يعلقون كما يحلو لهم فليس هناك اي نوع من الاحتفاليه كما ذكر الاخ هاشم وهذا مجرد راي

العزيز هاشم اتفق معك في ان الزلابيه مظهر احتفائي لكن اري ان لها فلسفة خاصه لاكلها في بيوت العزاء حيث انه لما ياكل اهل الميت الزلابيه ينتابهم الشعور انهم بداوا يعيشوا جواحتفائي وخرجوا من الصمت الجنائزي وهي ضربة البدايه لكسر الحزن لهم تحيا الزلابيه !!!!!

» هكذا خبرونا