الدوس حاضرا

قصيدة للشاعر /الدوش
اهديها لكل اعضاء المنتدى وزواره

حأسأل عن بلد رايح
وافتش عن بلد سايح
واسأل عن أمانينا
اللي ما بتدينا صوت صايح
وأسأل وين مخابينا
إذا جانا الزمن... لا فح
واسأل عن بلد مجروح
وعارف الجارحو ليه جارح
وابكى على بلد ممدوح
وعارف المادحو ..ما مادح
واحلم بي حلم مسروق ..لا هو الليلة ..لا امبارح
أعلق في جناح سفري
خطابات لي زمن فجري
وادخل من درب سري
لكل مضاجع الأحزان
واضفِّر من شجر بلدي
بروقاً مارقة من صدري
حأسأل عن بلد غاطٍ لحدِّ الليلة في الوجعة
أَنط فوق سرجي واتْحزَّم
أقوم من وقعة ..لوقعة
أخُتْ ايدي البتوجِعْني على السأم البراجِعْني
واسأل..
يا وطن يا بيتنا
ليه شوقك مواجهني
ليه حبك مجهجهني
وليه تاريخ زمن خسران
موكّر لسَّه في شجني؟
حأكتب لي شجر مقطوع
مسادير
يمكن يتحرك
خطابات لي طفل مجدوع
..يقوم
يجرى..
...يقع
يبرُك ..
رسالة لكل قُمْريّة
إذا دم الشقا أتوزع
على كل البيوت ..ما تْرِك
واسأل..
عن وطن رايِح
واديكم خبر جارح:
بأنو جميع جموع الناس
حيفضلوا لا كراع ..لا راس
ونشترى في الدكاكين يوم ..مسابح من دموع الناس
مساحيق من هموم الناس
...زهج
يتْعَبّأ في الأكياس
ونعلن في المزاد علنا
وترغي الجوقة والأجراس:
"!نبيع الطفلة والكراس"
واصرَخ ..
! ياوطن! يا بيتنا
ليه ما تبقى لينا الساس
قدر ما تجري فيك
أفكار...
يزيدوا الحبس والحراس
قدر ما تجري فيك الخيل ..تدوس الهيبة والإحساس
...واسأل ...
يا وطن رايح
اذا كل القبور دخلت بيوت الناس
بلا اسئذان..بلا صلوات ..بلا أكفان
جريمة أسائل الدفَان؟!؟!؟!؟
حريمة طلب تمن قبري
من البايع في أي مكان؟!؟!؟
واقولك يا وطن رايح
واقولك يا وطن آمر
سلام النفس ما كافر
ولا كافر
ولا كافر

الاخ ابو نورا
اجمل ما بتعلق بالشاعر الدوش
هي قصيدة لم يكتبها
قصيدة كتبها محجوب شريف في رثاء الشاعر عمر الجوش