مسامحك,,,,,,,,

تحياتي الأخ خالد ويسرني ان اقدم النص الأصلي للقصيدة

وهي للشاعر وداحمرعين وسبق نشرها في العديد من المنتديات

وهي بعنوان ( سامحتك عشان العيد )و:سامحتك عشان العيد
عشان العيد أنا مسامحك
لا عشان خاطرك ولا ريدي
سامحتك عشان العيد
بصافي الناس
وريدك كان زمان عيدي
سامحتك وما ندمان
علي الماضي الصبح إدمان
وأحلي أيام قضيتها معاك
ولا اتأسيت علي قلبي
ولا الفرح الساق مطاياه
فارق راح وفات دربي

سامحتك ياسهر الليل
ويا الدمعة التقول لي السيل
شنو بتعرف !
ويا الجرح الدفين بِنْزِف
ويا وتر بالوجع نضّاح
لمّا الكون ينوم بِعْزِف
سامحتك....!
عشان جرحي البِلِحْ نتّاح
يطول عمرو ويعيش أكتر
سامحتك وما بقدر أخون جرحي
لأنو براك َ ما بِكْبَر
سامحتك....!
وعارفك ما مستنّي مني سماح
ولا بهمّك أموت مرتاح
ولا بضيرك شقاء الإحساس
سامحتك لأجل العيد
لأنّو العيد بصافي الناس !

سامحتك يا سهر الليل
ويا الدمعة التقول للسيل
شنو بتعرف